Алкараз со 6-2, 6-4 над Медведев, полуфиналето е на дофат

Карлос Алкараз на Ролан Гарос
Фото: Like tears in rain / Wikimedia Commons (CC BY-SA 4.0)

Шпанскиот тенисер Карлос Алкараз го совлада Данил Медведев со 6-2, 6-4 во второто коло од групата „Иван Лендл“ на завршниот турнир во Торино и е на чекор од полуфиналето, пренесува АТП.

Вториот носител до победата стигна за еден час и 12 минути, а во текот на целиот меч во „Иналпи арена“ не се соочи ниту со една брејк-топка.

Алкараз го доби првиот сет со два последователни брејка, а во вториот повторно му го одзеде сервисот на Медведев уште на почетокот. Рускиот тенисер успеа да ги задржи своите сервисни гемови до крајот, но не најде начин да се врати во мечот.

Единствената грижа за Шпанецот се појави во вториот сет, кога при водство од 2-1 побара помош од физиотерапевтот поради проблем во горниот дел од левата нога. Според Стрејтс тајмс, левата бутина му беше бандажирана, но тоа не влијаеше врз неговата игра и тој мирно го доведе мечот до крај со својот сервис.

Ова е 11та последователна победа за Алкараз, кој пред Торино ги освои титулите во Виена и Париз. Тој го подобри и скорот во меѓусебните дуели со Медведев на 8-3, откако претходно оваа есен го победи и во полуфиналето во Виена.

Со две победи од два меча, Алкараз ќе обезбеди пласман во полуфиналето уште вечерва доколку Френсис Тиафо освои барем еден сет против Флавио Коболи во вечерната сесија. Шпанецот последниот меч во групата ќе го игра против Коболи во петок, а Медведев, кој на стартот го совлада Италијанецот, ќе се соочи со Тиафо.

Алкараз во првото коло го победи Тиафо со 6-2, 6-2. Лани стигна до финалето во Торино, каде што загуби од Јаник Синер, а сега ја бара својата прва титула на завршниот турнир на сезоната. Медведев е шампион на овој турнир од пред шест години.