Зверев го прими трофејот за прв тенисер на светот за 2026 година

Александар Зверев
Фото: si. robi / Wikimedia Commons (CC BY-SA 2.0)

Александар Зверев во понеделникот вечерта на завршниот турнир во Торино го прими трофејот за прв тенисер на светот на крајот од годината, кој му го врачи претседателот на АТП, Андреа Гауденци, пренесува АТП.

Германецот е првиот тенисер од својата земја што ја завршува сезоната на чело на АТП-листата и најстариот што го постигнува тоа првпат. На датумот на завршната ранг-листа, 23 ноември, ќе има 29 години и 217 дена, со што ќе ги надмине Андре Агаси (29 години и 214 дена во 1999 година) и Енди Мареј (29 години и 197 дена во 2016 година).

https://x.com/atptour/status/2122422744759316949

„Голема чест е да го држам овој трофеј. Минатата година, играјќи на овој турнир, си мислев дека можеби можам да освојам гренд слем титула. Но, не замислував дека ќе стојам тука со овој трофеј. Да бидам број еден на крајот од годината е најпосебната работа. Тоа е најголемиот успех во мојата кариера“, рече Зверев на теренот.

Оваа сезона му е најдобра во кариерата. Ги освои првите две гренд слем титули, на Ролан Гарос и на УС Опен, стигна до полуфиналето на Австралија опен и до своето прво финале на Вимблдон. Со 66 победи е најуспешниот тенисер на турата во 2026 година.

Зверев е четвртиот активен тенисер со ова признание, по Новак Ѓоковиќ, кој го има освоено рекордни осум пати, Карлос Алкараз (двапати) и Јаник Синер (еднаш). На врвот на ранг-листата се искачи на 2 ноември, како втор Германец по Борис Бекер, наведува Евроспорт.

Церемонијата се одржа на теренот пред мечот меѓу Флавио Коболи и Данил Медведев, а истиот ден признание за најдобар двоен пар на годината добија Хари Хелиовара и Хенри Патен, пишува Анса.

Зверев го започна турнирот во Торино со победа во два сета над Рафаел Ходар, а во вторник од 20:30 часот го игра вториот меч во групата против Бен Шелтон, во реприза на финалето од УС Опен.