Лука Дончиќ ја продолжува историската серија. Словенечкиот кошаркар постигна 40 поени во победата на Лос Анџелес Лејкерс на гостувањето кај Сакраменто Кингс со 116-103, а со тоа стана првиот играч по Мајкл Џордан кој во првите осум натпревари од сезоната собрал над 300 поени, пренесува Еј-ес-пи-ен.
Дончиќ досега има 308 поени на осум натпревари. Џордан во сезоната 1988/89 на ист број натпревари имаше 303 поени. Повеќе од Словенецот во првите осум натпревари од сезоната постигнал само Вилт Чемберлен, кој тоа го направил трипати, а неговиот рекорд изнесува 418 поени од сезоната 1962/63.
Шести натпревар по ред со најмалку 35 поени
Против Кингс, Дончиќ шутираше 11 од 23 од игра, погоди шест тројки и реализираше 12 од 13 слободни фрлања. Додаде и девет скока и седум асистенции. Ова му беше шести натпревар по ред со најмалку 35 поени.
Според Токбаскет, Дончиќ на сите шест натпревари од серијата имал најмалку 35 поени, пет скока, пет асистенции и пет погодени тројки, нешто што досега не му успеало на никого во историјата на НБА. Ова му беше и 66ти натпревар во кариерата со таков учинок, со што го престигна Стеф Кари и се искачи на второто место на вечната листа, според податоците на Лејкерс.
Натпреварот се преломи кон крајот на второто полувреме, кога Дончиќ постигна 11 поени по ред, меѓу кои и три последователни тројки, за водство од 57-48. Лејкерс до крајот не ја испуштија предноста.
Инцидент со навивач
Кон крајот на третата четвртина, навивач покрај теренот силно ја фрли топката кон судијката Челиса Пејнтер. Дончиќ веднаш покажа кон него, а обезбедувањето го отстрани навивачот од неговото место.
Кај Лејкерс, Остин Ривс постигна 21 поен, а Вокер Кеслер имаше 15 поени, осум скока и четири блокади. Кај Кингс, новајлијата Дариус Акуф Џуниор забележа 22 поени и 12 асистенции, Зак Лавин постигна 21 поен, а Домантас Сабонис 16 поени и 17 скока.
Лејкерс со оваа победа стигнаа до скор од 7-2 и ја забележаа третата победа по ред. Сакраменто има учинок од 1-7. Лејкерс во петок ќе го пречекаат Портланд во НБА купот.
