Хари Кејн останува во Баерн Минхен. Капитенот на англиската репрезентација и актуелен освојувач на Златната топка потпиша нов двегодишен договор со германскиот шампион, кој ќе важи до 30 јуни 2029 година, објави Бундеслигата.
Досегашниот договор на 33-годишниот напаѓач влезе во последната година од важноста, па Кејн на крајот од сезоната можеше да остане без клуб. По повеќемесечни преговори, неговиот престој во Минхен и официјално е продолжен, пишува Шпигел.
Кејн: Се чувствувам како дома
„Во Баерн се чувствувам како дома. Го сакам клубот, навивачите и градот Минхен. Имаме фантастичен тим, а во Венсан Компани фантастичен тренер. Многу сум горд што сум дел од овој клуб“, изјави Кејн.
„Целото мое семејство е многу среќно тука. Сакав да останам. Сега со нетрпение го очекувам она што доаѓа и сакам да освојам уште многу трофеи со овој голем клуб“, додаде англискиот напаѓач.
156 гола на 161 натпревар
Кејн пристигна во Баерн во 2023 година од Тотенхем за околу 100 милиони евра. Оттогаш, на 161 официјален натпревар постигна 156 гола и забележа 42 асистенции. Со Баерн двапати стана шампион на Германија, а освои и еден Куп и два Суперкупа. Минатата сезона постави клупски рекорд со 61 гол на 51 натпревар, пренесува Би-би-си.
Минатиот месец Кејн ја освои Златната топка, со што стана првиот играч од Бундеслигата по 30 години кој го освоил ова признание. Со новиот договор ќе остане во Минхен речиси до својот 36ти роденден.
Најскапиот договор во историјата на клубот
Баерн не ги објави финансиските детали, но според германските медиуми, ова е најисплатливиот договор во историјата на клубот, пишува Гардијан.
„Многу сме среќни што го продолживме договорот на Хари Кејн. Ова се фантастични вести за нас, за нашите навивачи и за Бундеслигата. Освојувачот на Златната топка останува во Баерн“, изјави генералниот директор Јан-Кристијан Дресен. Спортскиот директор Макс Еберл додаде дека продолжувањето на договорот му дава на клубот сигурност во планирањето и дека Кејн ќе остане клучна фигура околу која ќе се гради тимот.
Кејн сега има голема цел пред себе. Тој повеќепати истакна дека сака со Баерн да ја освои Лигата на шампионите, трофејот што досега му недостасува во кариерата.
