Наполи доживеа тежок пораз во Лигата на шампионите. Италијанскиот тим во четвртото коло гостуваше кај Порто и загуби со 1-4, со што дополнително се зголеми притисокот врз тренерот Масимилијано Алегри, пренесува беИН Спортс.
Порто поведе уште во 11тата минута, кога Беднарек погоди со глава по корнерот на Габри Веига. Наполи изедначи во 43тата минута, кога Скот Мактоминеј ја искористи одбиената топка по интервенцијата на Диого Коста при ударот на Расмус Хојлунд.
Веига ја водеше екипата
Во второто полувреме Порто беше многу подобар тим. Во 71вата минута Веига постигна гол по додавањето на Хименес, а во 80тата минута Кивиор со глава, по корнерот на Хванг, го зголеми водството. Конечниот резултат од 4-1 го постави Саму од пенал во 90тата минута, откако Рафа Марин доби црвен картон. На Порто му беше поништен гол на Пепе, додека на Наполи му беше поништен гол на Кевин де Бројне поради офсајд.
Ова беше 60тата домашна победа на Порто во Лигата на шампионите, со што португалскиот клуб го престигна Пари Сен-Жермен на оваа листа. Наполи по четири кола има само три бода, а во неделата загуби и од Јувентус во Серија А.
Арсенал преживеа во Прага
Во другите натпревари од вечерта, Арсенал гостуваше кај Славија во Прага и победи со 2-1. Головите за лондонскиот тим ги постигнаа Нони Мадуеке во 9тата и Виктор Ѓокереш во 38мата минута, а Новак го намали резултатот во 90тата минута, пренесува Скај Спортс. Арсенал е на третото место на табелата.
„Тоа беа две многу различни полувремиња. Бевме многу невнимателни, имаме многу да научиме“, изјави тренерот на Арсенал, Микел Артета.
Борусија Дортмунд го совлада Бетис со 2-1, ПСВ загуби од Клуб Бриж со 1-2, а норвешкиот Викинг го победи Сабах со 4-1.
