Американската федерација за скијање и сноуборд официјално ги објави 49 скијачи кои го сочинуваат алпскиот тим на САД за сезоната 2026/27, а на списокот, во А тимот, се наоѓа и Линдзи Вон. Сите избрани спортисти се квалификувале според постојните критериуми на федерацијата.
Во соопштението на U.S. Ski & Snowboard се наведува дека трократната олимписка медалистка и освојувачка на 84 трки во Светскиот куп сè уште се опоравува од повредите што ги доживеа на Олимписките игри во Милано и Кортина д’Ампецо.
Изборот е изненадување бидејќи брзо враќање на стазите практично не е можно. Според германската агенција ДПА, чиј текст го пренесе Yahoo Sports, Вон ја чека уште една операција во ноември, при која ќе ѝ бидат извадени металните импланти од ногата и ќе ѝ биде заменет предниот вкрстен лигамент. Опоравувањето по тој зафат се очекува да трае околу шест месеци.
41-годишната скијачка се врати од пензија во сезоната 2024/25 со цел да освои уште еден олимписки медал и во Италија пристигна како водечка во поредокот на спустот во Светскиот куп. Во Кортина настапи со скинат преден вкрстен лигамент на левото колено, повреда што ја доживеа при пад девет дена пред олимписката трка.
Нејзиниот олимписки спуст на 8 февруари траеше само 13 секунди. Вон ја закачи вратичката и тешко падна, при што доживеа комплицирана фрактура на тибијата, а подоцна изјави дека лекарите ѝ ја спасиле ногата од ампутација.
Во А тимот на САД се и најуспешната алпска скијачка на сите времиња Микаела Шифрин, актуелна освојувачка на големиот Кристален глобус, олимписката шампионка во спуст Брези Џонсон, како и Џеклин Вајлс и Паула Молцан. Кај мажите е и двократниот олимписки сребрен медалист во супервелеслалом Рајан Кокран Сигл.
„Ова е многу решителна и импресивна група алпски скијачи, целосно подготвени да се натпреваруваат на највисоко ниво во сезона во која се одржува светско првенство“, изјави алпскиот директор Саша Ририк.
Светскиот куп започнува на 24 и 25 октомври во Зелден со традиционалните велеслаломи, а врвот на сезоната е Светското првенство во Кран Монтана во Швајцарија, од 1 до 14 февруари 2027 година.
