Поранешниот претседател на Кошаркарската федерација на Грција, Вангелис Лиолиос, е притворен. Одлуката ја донесоа истражниот судија и обвинителот во судот „Евелпидон“ во Атина, по долгото сослушување во неделата.
Во притвор е и неговиот близок соработник, бизнисменот Јоргос Мавраганис. Двајцата се осомничени за повеќекратно поткупување според законот за спорт, а ги отфрлаат обвиненијата. Според Катимерини, Лиолиос сведочеше неколку часа и го претстави случајот како заговор за негово отстранување од функцијата, тврдејќи дека Мавраганис дејствувал самостојно.
Мавраганис даде краток исказ, кој траеше околу 40 минути. Тој ги негираше наводите дека во име на Лиолиос се обидувал да влијае врз резултатите, иако повеќе сведоци го товарат токму за тоа.
Со оваа одлука бројот на притворени осомничени се зголеми на тројца. Во петокот во притвор заврши поранешниот меѓународен судија Петрос Папапетру, во чиј дом, според Грик Репортер, биле пронајдени 820.000 евра во готовина. Истрагата опфаќа околу 50 кошаркарски натпревари во период од неколку години, од највисокиот ранг до пониските лиги.
Одбраната тврди дека судиите за натпреварите во националните лиги се определуваат преку електронски алгоритам, без можност за човечко влијание, пренесува Прото Тема.
Денеска пред истражниот судија треба да се појават уште тројца осомничени: меѓународната судијка Васо Царуха, судискиот советник Илиас Коромилас и еден поранешен судија, член на Централната судиска комисија. Евролигата веќе ја повлече Царуха од судиските делегирања до натамошната истрага.
Аферата предизвика реакции и на институционално ниво. Министерот за спорт Јанис Врутсис денеска има средба со членовите на управата на федерацијата.
