Џеди Осман ќе отсуствува три месеци по операцијата

Џеди Осман во дресот на Панатинаикос
Фото: Zafer / Wikimedia Commons (CC BY 4.0)

Џеди Осман, кој е роден во Охрид, успешно беше опериран во Истанбул поради повреда на десното колено, соопшти ПАОК.

Клубот од Солун потврди дека станува збор за артроскопска санација на обемно кинење на менискусот. Интервенцијата беше извршена во саботата попладне.

Операцијата ја изведе Бариш Коџаоглу, лекар на кошаркарската репрезентација на Турција, а присутен беше и клупскиот доктор на ПАОК, Михаил Самарас, се вели во соопштението објавено на страницата на ПАОК.

Проценетиот период на закрепнување е три месеци. Потоа Осман постепено ќе се враќа на тренинзите и натпреварите на ПАОК.

Повредата беше дијагностицирана пред неколку дена со магнетна резонанца, поради болки во коленото. Тогаш клубот најави дека рокот за враќање ќе биде познат дури по операцијата.

Осман настапува за репрезентацијата на Турција, а во ПАОК пристигна ова лето по две сезони во Панатинаикос. Пред враќањето во Европа, одигра седум сезони во НБА, во Кливленд и Сан Антонио.

Од клубот порачаа дека целиот ПАОК стои зад Осман и дека веруваат оти ќе се врати уште посилен. Истата информација ја пренесе и Јурохупс.