Пандев: Мечот против Холандија ќе биде мој последен за Македонија!

Капитенот Горан Пандев на денешната прес-конференција потврди дека ова е негов последен натпревар во кариерата во дресот на Македонија.

„Да, ова за мене е последен натпревар во дресот на македонска репрезентација. И јас и моите колеги заедно со селекторот, направивме нешто што не знам дали ќе биде повторено. Сакам да им порачам на моите соиграчи да се пласираат на Светското првенство, станува збор за фантастични играчи кои играат во големи клубови и верувам дека можат тоа да го остварат“, вели Пандев.

Натпреварот со Холандија ќе биде посебен за него.

„Сигурно дека натпреварот ќе биде посебен, се надевам дека ќе ги израдуваме навивачите со позитивен резултат. Среќен сум што се оствари мојот сон да играм со Македонија на едно големо натпреварување. Не знам дали би имало подобра прилика во иднина, ќе се простам на еден легендарен стадион како „Јохан Кројф“, изјави Пандев.