Шкендија Арачиново ја продолжи добрата форма во Првата македонска фудбалска лига, откако во Гостивар го совлада Арсими со 2-0. Во другиот неделен натпревар, Башкими и Брегалница одиграа 1-1 во Куманово.
Гостите од Арачиново поведоа на самиот почеток на второто полувреме. Младинскиот репрезентативец Дашмир Елези во 47мата минута го постигна првиот гол.
Арсими потоа тргна по изедначување и ја имаше најдобрата шанса, но Гаје од непосредна близина ја погоди само гредата. Во финишот, по центаршутот на Аритон Мемед, топката го погоди во рака бранителот на Арсими, Ел Хаџи Геје, а судијата, по прегледот на ВАР, досуди пенал.
Капитенот Бесир Демири беше сигурен од белата точка во 86тата минута за конечните 2-0. Шкендија Арачиново сега е на петтото место со 18 бода и го престигна Силекс, а Арсими е претпоследен со десет бода.
Натпреварот во Куманово започна со доцнење од околу 15 минути бидејќи на стадионот немаше противпожарно возило. Башкими поведе во 27мата минута, кога Јахаја Фавзи, по центаршутот на Капланај, со глава го совлада голманот Амир Јашар.
Брегалница одговори во 73тата минута. Кристијан Стојковски ја започна акцијата по десната страна, Иван Николов со глава ја врати топката пред голот, а Натаниел Лоренцо ја смести во мрежата за 1-1.
Башкими до крајот се обиде да дојде до победа, но Бејзад Лимани ја пропушти најдобрата шанса. Брегалница сега има 14 бода и е седма, а Башкими е осми со 11 бода.
По репрезентативната пауза, Брегалница ќе ја пречека Струга, а Башкими ќе гостува кај Шкендија Арачиново.
