Клуб Брига приреди едно од најголемите изненадувања во второто коло од Лигата на шампионите. Белгискиот тим го совлада Интер со 4-3 на Сан Сиро, а херој на вечерта беше Николо Тресолди со хет-трик. За Интер ова е четврти последователен пораз во Лигата на шампионите, што според BBC Sport му се случува за првпат во историјата.
Тресолди, кој претходно ја погоди и стативата, им донесе водство на гостите во 30тата минута од пенал, откако Хакан Чалханоглу направи прекршок врз Карлос Форбс. Лаутаро Мартинез изедначи пред паузата, кога по комбинацијата на Маркус Тирам и Федерико Димарко по левата страна се ослободи од чуварот, се заврте и прецизно шутираше, пренесува RTE.
Грешка на Интер, втор гол за Тресолди
Во второто полувреме Интер направи скапа грешка. По недоразбирање меѓу голманот Жозеп Мартинез и одбраната, Форбс ја протна топката меѓу нозете на голманот, а Тресолди во 63тата минута само ја турна во празната мрежа. Единаесет минути подоцна италијанскиот голман го одбрани првиот удар, но Тресолди стигна до одбиената топка и силно погоди во долниот агол за 1-3 и хет-трик.
Лаутаро Мартинез во 81вата минута го постигна својот втор гол и го врати Интер во игра, но Ромео Вермант во 87мата минута повторно ја зголеми предноста на гостите на два гола. Резервистот Анж-Јоан Бони длабоко во судиското продолжение го постави конечниот резултат од 3-4, но тоа беше само утеха за домашните навивачи.
Тресолди, роден во Италија, беше прогласен за играч на натпреварот според UEFA. Тој по натпреварот ја однесе топката дома како награда за трите постигнати гола.
Интер без бод, Брига со прва победа
Интер по две кола во новата сезона од Лигата на шампионите нема освоено ниту еден бод, со гол-разлика 4-6. Клуб Брига, кој загуби во првото коло, сега има три бода и ја израмни гол-разликата на 6-6.
Поразот дојде само неколку дена по убедливата победа над Парма во Серија А, каде што Нераѕурите се во врвот на табелата. Во Европа, пак, сликата е сосема поинаква и миланскиот тим веќе по второто коло е под притисок во борбата за пласман во нокаут-фазата.
