Голден Стејт Валкирис се новите шампионки во ВНБА. Тимот од Сан Франциско во саботата навечер (по локално време) ја совлада Атланта Дрим со 68-63 во седмиот натпревар од финалето во Чејс центар и серијата ја доби со 4-3, пренесува Еј-пи.
Валкирис ја освоија титулата во својата втора сезона во лигата и станаа првиот новоформиран тим кој стигнал до шампионскиот трофеј толку брзо, наведува официјалниот портал на Голден Стејт Валкирис.
Јунак на одлучувачкиот натпревар беше Габи Вилијамс со 30 поени и четири блокади. Таа постигна 28 поени во второто полувреме, што е рекорд за едно полувреме во финале на ВНБА, а беше прогласена и за најкорисна играчка во финалната серија.
Атланта беше подобра во првото полувреме и на одмор замина со шест поени предност, но Вилијамс во третата четвртина постигна 15 поени и ги врати домаќинките во игра. Во четвртата четвртина Вилијамс продолжи во истиот ритам и ги предводеше Валкирис до титулата.
„Ги сакам ваквите моменти. Натали ми рече да бидам трпелива во првото полувреме и тоа го направив“, изјави Вилијамс, мислејќи на главната тренерка Натали Накасе.
Големо влијание имаше и центарката Кија Стоукс, која со 19 блокади во серијата постави нов рекорд во финалињата на ВНБА. Претходниот рекорд од 12 блокади таа го надмина уште во четвртиот натпревар.
Финалната серија беше полна со пресврти. Валкирис го добија првиот натпревар со 68-64, потоа загубија двапати, со 65-79 и 71-97, а потоа победија со 67-62 и 64-55. Атланта изнуди седми натпревар со победата од 80-69, но во одлучувачкиот дуел домаќинките ја искористија предноста на домашниот терен.
Валкирис ја завршија регуларната сезона со 32 победи и 12 порази како втор носител, а седмиот натпревар од финалето беше нивниот 53ти последователен распродаден натпревар.
