Вирц со два гола во победата на Германија од 5-0 над Холандија

Флоријан Вирц во дресот на Германија
Фото: YantsImages / Wikimedia Commons (CC BY-SA 4.0)

Германија синоќа на Олимпискиот стадион во Берлин ја совлада Холандија со 5-0 во последното коло од Групата А2 во Лигата на нациите и како првопласирана во групата се пласираше во четвртфиналето. Флоријан Вирц постигна два гола, а по еден додадоа Дери Шерхант, Нико Шлотербек и Брајан Груда, пренесува ДФБ.

Ова е највисоката победа на Германија над Холандија по триумфот од 7-0 во 1959 година и прв пораз на Холанѓаните откако Шави Ернандес ја презеде репрезентацијата во август, пренесува Гардијан.

https://x.com/UEFAEURO/status/2122443902380847122

Првото полувреме помина без многу шанси. Шерхант во 32та минута ја погоди стативата, а во 41та минута, по додавање на Јозуа Кимих, со прецизен удар во горниот агол им донесе предност на домаќините.

Германците во второто полувреме целосно ја презедоа контролата. Вирц во 60та минута постигна гол од околу 20 метри, а пет минути подоцна Шлотербек со глава го искористи слободниот удар на Груда за 3-0.

Груда во 71ва минута асистираше и за вториот гол на Вирц од непосредна близина, а во 77ма минута и самиот се запиша меѓу стрелците, откако топката по ударот на Шерхант се одби од стативата.

Германија, Холандија и Грција ја завршија групата со по 11 бода, а Германците и Холанѓаните продолжуваат понатаму благодарение на меѓусебните резултати, пренесува УЕФА. Жрепката за четвртфиналето е во петок.

„Сите ќе си одат дома со насмевка, а барем следните три-четири месеци никој нема да ја доведува во прашање германската репрезентација. Имаме прекрасни фудбалери и големи карактери, момците се изненадуваат и самите себеси“, изјави Јирген Клоп, пренесува Гардијан.

Клоп ја води Германија на шест натпревари, а 22-годишниот Груда со гол и две асистенции се истакна во својот втор настап за репрезентацијата, наведува Еј-пи. Според ДФБ, Германија на овој натпревар за последен пат играше во опрема на Адидас, по партнерство што траеше 70 години.