Еден од најдобрите тенисери во историјата, Рафаел Надал, откри дека не го интересира ждрепката за Роџерс Купот бидејќи на секој ривал исто ќе му се посвети.
Шпанецот е прв носител и е слободен во првото коло, а во второто ќе игра против подобриот од дуелот помеѓу Бено Пер и Џаред Доналдсон. Потенцијални ривали во третото коло би можеле да му бидат Станислав Вавринка или Ник Кирјос.
„Не можам да мислам за Вавринка и Кирјос пред да го одиграм првиот натпревар. Не сакам да размислувам што ме очекува по првиот ривал, зашто сум целосно фокусиран на него. Секогаш во мислите ми е само првиот нареден дуел и тоа е единствен начин да се успее“, кажа Надал.
Последниот натпревар го одигра во полуфиналето на Вимблдон кога загуби од Новак Ѓоковиќ.
„Немав многу тренинзи пред да дојдам во Торонто. Зад мене е многу долга сезона на земјена подлога, а потоа играв и тешки натпревари на Вимблдон. Ми беше потребно време да одморам и физички и психички“, објасни Шпанецот.
Турнирот во Торонто почнува на шести август, а титулата ја брани Александер Зверев.
