Реџеп Рушити е на чекор до медал на Светското првенство во карате за кадети, јуниори и младинци до 21 година во Бјелско-Бјала, Полска. Македонскиот каратист во категоријата до 84 килограми, во конкуренција до 21 година, ќе се бори за бронзениот медал против Сенегалецот Серињ Мбаке Сек.
Рушити го почна натпреварувањето со победа од 3-1 над Французинот Јасин Бен Фаталах, а потоа загуби со минимални 0-1 од Египќанецот Омар Осман. Според македонските медиуми, во тој дуел на нашиот борец не му биле досудени два поени.
Поразот, сепак, не беше крај на патот. Осман подоцна стигна до финалето, откако во полуфиналето го победи токму Сек со 4-1, а во борбата за златото ќе се соочи со Украинецот Никита Дмитренко, објави WKF. Со пласманот на Осман во финалето, Рушити доби шанса во репасажот.
Во репасажот македонскиот каратист имаше феноменален настап. Прво го победи Полјакот Виктор Војарски со убедливи 9-0, потоа беше подобар од Холанѓанецот Ниек ван дер Веиде со 5-2, а во третата борба против Алжирецот Абдерразак Гори, која заврши со 0-0, повторно направи чекор напред.
Малку му недостигаше и на Филип Стојанов да се бори за медал во категоријата над 84 килограми. Тој ги совлада Бразилецот Лукас Биспо со 2-0, Мароканецот Отмане Небал со 1-0 и Австриецот Арман Селимовиќ со 4-0, но во четвртата борба загуби од Французинот Адам Таџер со 2-4.
Таџер потоа загуби во полуфиналето од Александер Дејвис од Луксембург со 0-3, па Стојанов остана без право на репасаж и без шанса за бронза.
По две победи на првенството забележаа и Кенза Фетаи во категоријата до 61 килограм, Цветан Маргаритов во категоријата до 60 килограми и Вукашин Јовановиќ во категоријата до 67 килограми. Јовановиќ стигна до борбата против Ерменецот Јура Залјан, кој подоцна настапи во полуфиналето.
На Светското првенство во Бјелско-Бјала настапуваат каратисти од 114 држави, а Македонија има 31 претставник. Борбите за медали во конкуренцијата до 21 година се закажани за недела, кога Рушити ќе има шанса да донесе медал за Македонија.
