Комо приреди една од највпечатливите вечери во историјата на Лигата на шампионите. Екипата на Сеск Фабрегас во четвртото коло од лигашката фаза гостуваше кај Ленс и победи со убедливи 9-1, пренесува Би-би-си.
Со деветте постигнати гола Комо го израмни рекордот за најмногу голови постигнати од еден тим на натпревар во Лигата на шампионите, кој досега го држеше Баерн Минхен со победата од 9-2 над Динамо Загреб во 2024 година. Според АФП, ова е и најтешкиот пораз на еден француски клуб во ова натпреварување, а Комо стана првата гостинска екипа што постигнала девет гола на еден натпревар.
Хет-трик на Дувикас
Главен јунак беше грчкиот напаѓач Анастасиос Дувикас, кој постигна хет-трик. Тој ја погоди мрежата во 7мата, 32рата и 57мата минута. Покрај него, стрелци беа Нико Паз во 40тата, Да Куња во 47мата, Кемпф во 53тата, Либерали во 62рата и Батурина во 69тата минута. Деветтиот гол во дополнителното време го постигна 18-годишниот Папачоли, по проверка на ВАР за офсајд.
Единствениот гол за Ленс го постигна Агилар во 65тата минута со волеј по додавање на Товен. Домаќините имаа шанса и од пенал, но судијата ја поништи одлуката по прегледување на снимката со ВАР.
Гестот на Нико Паз
Посебен момент се случи по голот на Нико Паз. Аргентинецот, наместо да слави, отиде до клупата и покажа маица со ликот на Хесус де Мигел, фудбалерот на Тенерифе кој трагично почина пред неколку дена. Паз е роден на Тенерифе, каде што ги направи првите фудбалски чекори во младинската школа на клубот, а за Тенерифе играше и неговиот татко Пабло Паз.
Според Фотмоб, победата со разлика од осум гола е израмнување на рекордот за најубедлива победа во историјата на Лигата на шампионите.
Комо меѓу најдобрите
Со оваа победа Комо стигна до девет освоени бода и се искачи на четвртото место на табелата во лигашката фаза. Ленс со три бода е на 33тото место.
