Виктор Вембањама го одигра најдобриот натпревар во кариерата. Францускиот центар постигна 52 поени и забележа 24 скока, што се негови рекорди во кариерата, а додаде и осум блокади и две украдени топки во победата на Сан Антонио Спарс над Далас Маверикс со 112-111, пренесува Еј-пи.
Вембањама е првиот играч по Боб Макаду во 1974 година со најмалку 50 поени, 20 скока и пет блокади на еден натпревар. Според Ен-би-си спортс, само уште Вилт Чемберлен има натпревар со над 50 поени, 20 скока и вкупно десет блокади и украдени топки.
Игра и покрај болест и повреда
Францускиот кошаркар до историскиот учинок стигна иако се бореше со вирус, а во последната четвртина го повреди и глуждот. Шутираше 16 од 28 од игра и 19 од 23 од линијата за слободни фрлања, но погоди само една од осум тројки. Затоа се насочи кон играта под кошот, каде што имаше 14 погодоци од 18 обиди.
Уште на полувремето имаше 29 поени, 15 скока и пет блокади. Тој е првиот играч од 1996 година, откако се води детална статистика, со најмалку 25 поени, десет скока и пет блокади во едно полувреме.
Вембањама: Можам и повеќе
„Можам и повеќе. Шутевите на овој натпревар не ми влегуваа и тоа ме принуди на стил на игра што е исцрпувачки. Можам да го правам тоа, доказот е тука, но можам да бидам многу подобар ако ми влегуваат шутевите. Знам дека е само прашање на време“, изјави Вембањама по натпреварот.
Ирвинг промаши за победа
Далас беше на чекор од пресврт. Спарс водеа со 68-51 на полувремето и со 73-54 на почетокот на третата четвртина, но Маверикс се вратија и со тројка на Пи Џеј Вашингтон стигнаа до водство од 103-100 на пет и пол минути пред крајот, пишува на официјалната страница на Далас Маверикс. Вембањама веднаш одговори со својата единствена тројка на натпреварот за 103-103, а во завршницата постигна десет поени.
Спарс поведоа со 112-111 откако Вембањама погоди едно од двете слободни фрлања на 24 секунди пред крајот. Во последниот напад Кајри Ирвинг шутираше од околу пет метри, но топката не влезе, а времето истече додека играчите на двете екипи се бореа за скокот. Ирвинг заврши со 29 поени, Наџи Маршал постигна 22, Вашингтон 21 поен и десет скока, а Купер Флаг 19 поени и десет скока.
Спарс стигнаа до шестата победа по ред и сега имаат учинок од шест победи и два порази, додека Далас има четири победи и четири порази. Вембањама со ваквите партии веќе се вбројува меѓу главните кандидати за наградата за најкорисен играч на сезоната.
