Британецот Џејк Диксон ќе го замени Жоан Мир во тимот на Хонда на Големата награда на Катар во Мото ГП, која се вози овој викенд на патеката Лусаил. Тоа го потврди тимот Хонда ХРЦ Кастрол, објави Мото ГП.
Мир, светскиот шампион од 2020 година, минатиот викенд се врати на патеката во Сепанг, но мораше да се повлече од трката во Малезија. Шпанецот ќе продолжи со опоравувањето дома.
Наместо него, во Катар ќе вози искусниот Диксон, кој оваа сезона се натпреварува во Светското првенство во супербајк за Хонда. Тој ќе биде тимски колега на Лука Марини.
Седум победи во Мото2
Диксон помина седум години во Гран при шампионатот, од 2019 до 2025 година, а во Мото2 оствари седум победи и 22 пласмани на подиумот. Во 2021 година настапи на две трки во Мото ГП, а најдобар пласман му беше 19тото место на домашната трка во Силверстон.
Мир минатиот викенд во Малезија се повлече откако почувствува вртоглавица и проблеми со видот. Диксон, пак, на патеката Лусаил го оствари својот најдобар пласман во Мото2 во 2023 година, кога заврши на петтото место.
Оваа сезона во супербајк за Британецот беше обележана со повреди, но во вториот дел од сезоната се врати во форма и забележа пет пласмани меѓу првите десет, пишува Моторспорт.
Диксон: Секој возач сонува за ова
„Најпрво сакам да ѝ се заблагодарам на Хонда за оваа можност. Секој повик да возиш ваков мотор е фантастичен и со нетрпение го очекувам викендот. Мислам дека секој возач уште како дете сонува да вози за фабричкиот тим на Хонда во Мото ГП“, изјави Диксон.
„Помина подолго време откако последен пат возев Мото ГП мотор, па ќе одиме чекор по чекор. Му посакувам на Жоан сè најдобро и се надевам дека наскоро ќе го видам повторно на моторот“, додаде тој.
