Голден Стејт Вориорс стравуваат за Стеф Кари, кој во средата навечер се повреди на гостувањето кај Хјустон Рокетс. Искусниот плејмејкер го напушти теренот уште во првата четвртина поради болка во десната страна на стомакот, а Вориорс загубија со 115-108 и ја прекинаа серијата од осум победи.
Кари почна да се држи за десната страна уште во првите минути од натпреварот. Околу седум и пол минути пред крајот на првата четвртина погоди тројка, но веднаш по шутот извика од болка и му покажа на стручниот штаб дека има проблем, пишува ЕСПН.
По краток разговор со тренерот Стив Кер, Кари замина во соблекувалната, а клубот на почетокот на втората четвртина објави дека нема да се врати на теренот. Тројката му беше единствениот кош на натпреварот.
„Ми рече дека нешто го повлекол во стомачниот дел и дека тоа никогаш досега не му се случило. Загриженоста е голема, но немам поим колку е сериозна повредата“, изјави Кер по натпреварот, пренесува Ен-Би-Еј.
Кари уште во второто полувреме ја напушти салата и замина на магнетна резонанца. Вориорс до четвртокот наутро немаа објавено резултати од снимањето ниту рок за враќање на теренот.
Повредата доаѓа во момент кога 38-годишниот Кари игра една од своите најдобри сезони. Двократниот најкорисен играч во лигата пред натпреварот во Хјустон беше втор стрелец во лигата со просек од 30,6 поени, а Голден Стејт по стартот од 0-3 стигна до осум последователни победи.
Во отсуство на Кари, најефикасен кај Вориорс беше новајлијата Јаксел Лендеборг со 25 поени и 10 скока. Голден Стејт има учинок од 8-4, а веќе подолго време е без Џими Батлер и Мозес Муди, кои се опоравуваат од повреди на коленото.
Вориорс следниот натпревар го играат во петок во Сан Антонио, а потоа во два последователни дена гостуваат во Далас и Њу Орлеанс, пишува Си-Би-Ес спортс.
