Медведев без брејк-топка против Коболи на стартот во Торино

Данил Медведев на тренинг на турнирот во Вашингтон
Фото: Hameltion / Wikimedia Commons (CC BY-SA 4.0)

Даниил Медведев го започна настапот на завршниот турнир на АТП во Торино со победа над домашниот тенисер Флавио Коболи со 7-6 (4), 6-3 во групата „Иван Лендл“, пренесува АТП. Рускиот тенисер, кој е петти на светската ранг-листа, не дозволи ниту една брејк-топка на мечот.

Медведев ги доби сите десет гема на свој сервис, имаше девет асови и освои 83 отсто од поените по првиот сервис, пренесува Тенис мејџорс. Коболи одбрани шест од осумте брејк-топки, но освои вкупно 55 поени, наспроти 70 на ривалот.

https://x.com/TennisTV/status/2122442676679082452

Италијанецот во првиот сет одбрани пет брејк-топки, две при 2-2 и три при 4-4, и го одведе сетот во тај-брејк. Медведев во тај-брејкот двапати поведе со мини-брејк и го доби со 7-4.

Во вториот сет Коболи го загуби сервисот во седмиот гем, при првата брејк-топка што ја имаше Медведев. Рускиот тенисер потоа уште еднаш му го одзеде сервисот на ривалот и со втората меч-топка ја заокружи победата.

„Добро сервирав, а тоа дава многу самодоверба. Многу го притискав, а притоа го намалив притисокот од себе. Знаев дека во еден момент тој притисок ќе се исплати и тоа и се случи“, изјави Медведев, пренесува Тенис мејџорс.

Ова беше прв натпревар за Коболи откако во октомври се повлече од мечот во третото коло во Виена против сонародникот Матео Беретини, кој синоќа беше меѓу гледачите. „Ова е една од најдобрите, ако не и најдобрата моја сезона досега. Малку сум тажен поради поразот, но ова не е крајот, имам уште два натпревари“, рече Италијанецот.

Медведев, шампион на завршниот турнир од 2020 година, во Торино настапува по седми пат, откако минатата година не успеа да се пласира. Тој сега води со 3-1 во меѓусебните дуели со Коболи, кој го победи во Мадрид оваа сезона, пренесува Скај спорт.

Медведев и Карлос Алкараз, кој претходно го совлада Френсис Тиафо, во средата ќе се сретнат во дуел на двајца тенисери со по една победа, додека Коболи ќе игра против Тиафо.