Васер: Судирот на Леклер со Хамилтон е целосно неприфатлив

Шарл Леклер во болидот на Ферари
Фото: Liauzh / Wikimedia Commons (CC BY-SA 4.0)

Шефот на Ферари, Фредерик Васер, остро го критикуваше Шарл Леклер по судирот со соиграчот Луис Хамилтон на Големата награда на Лас Вегас. „Јасно е дека тоа е неприфатливо“, изјави Васер за италијанскиот Скај, пренесува Скај спортс.

Двајцата возачи на Ферари се судрија во седмата кривина во 38миот круг, во борба за шестото место, на трка во која екипата се обидуваше да го надомести лошиот резултат од квалификациите, во кои и двајцата испаднаа уште во вториот дел. Хамилтон се заврте, а Леклер доби казна од 10 секунди.

Судиите оценија дека Леклер го започнал претекнувањето од „значителна оддалеченост“ зад соиграчот и дека немал право на предност во кривината, па го прогласија за целосно виновен. Монеганецот ја мина целта како шести, но по казната падна на 10тото место, додека Хамилтон, кој претходно и самиот доби казна од 10 секунди по борбата со Ландо Норис, заврши како седми, пишува Формула 1.

„Му рековме на Шарл да не претекнува, бидејќи на ваква трка треба да се фокусираш на сопственото возење, наместо да ризикуваш другите да те престигнат. Шарл очигледно згреши и тоа скапо ја чинеше екипата. Искрено, повеќе од вознемирен сум, бидејќи пораката беше јасна по Мексико“, рече Васер.

Возачите на Ферари се судрија и само неколку недели претходно, на Големата награда на Мексико, а Васер по таа трка разговараше со двајцата за нивната одговорност кон екипата. Хамилтон уште во септември, по инцидентот во првиот круг во Монца, побара јасни правила за борбите меѓу соиграчите.

Леклер ја прифати казната. „Се чувствувам прилично засрамено пред екипата. Ќе го анализираме тоа“, рече тој, а во соопштението на Ферари додаде: „Трката не заврши добро за нас, а мојата грешка беше дел од тоа. Ја прифаќам казната. Жал ми е за екипата, за сите во Маранело и за бодовите што ги изгубивме“.

„За тоа треба да одлучи Ферари. Направив сè што можам и кажав сè, па и повеќе од тоа“, одговори Хамилтон на прашањето дали е време за построги правила. Британецот додаде дека Ферари, со темпото што го имала, можела да стигне и до подиумот.

Формула 1 продолжува следниот викенд со Големата награда на Катар.