Српскиот тенисер Новак Ѓоковиќ предизвика голем број коментари пред неколку дена со изјавата дека навива за Хрватска на Светското првенство во Русија.
Ѓоковиќ тогаш кажа дека ќе навива за Хрватите и дека се надева дека ќе освојат златен медал, а неговата изјава ја критикуваа медиумите во Србија. Меѓутоа, откако им одржа „лекција“, по освојувањето на Вимблдон, тој повторно испрати порака до хрватските репрезентативци.
„Им честитам на Лука Модриќ и целата хрватска репрезентација на неверојатниот успех. Многу е убаво мала земја од нашиот регион да успее на големо натпреварување, како што е Светското првенство“, кажа Ѓоковиќ.
Српскиот тенисер е во добри односи со неколку Хрвати, а исто така тие му дадоа поддршка пред финалето во Вимблдон, каде што Ѓоковиќ по четврти пат го освои грен-слем турнирот.
