Ерлинг Халанд предизвика загриженост во Манчестер Сити, откако во неделата побара замена за време на поразот на Норвешка од Португалија со 1-2 во Лигата на нациите. Норвешкиот напаѓач му покажа на клупата дека сака да излезе и во 67та минута беше заменет со Јерген Странд Ларсен, при резултат 1-1, пишува ESPN.
Селекторот Стале Солбакен веднаш по натпреварот објасни дека станува збор за замор, а не за повреда. „Изгледаше целосно безопасно. Тој едноставно беше целосно испразнет“, изјави Солбакен за норвешкиот НРК, пренесува Liverpool.com.
Според Солбакен, минутажата на Халанд била договорена уште пред мечот. „Тој беше уморен против Велс и затоа имавме отворен разговор. Ги разгледавме можните варијанти. Можеше да ги одигра само последните 45 минути против Португалија, и тоа беше тема на разговор. Многу сум задоволен што издржа 60 добри минути“, рече селекторот.
За ТВ2 Солбакен додаде дека по разговорот се надевале на околу 60 минути, а Халанд издржал 65. Во Норвешка како причина за заморот се наведува и пократкиот одмор по Светското првенство, пишува Manchester Evening News.
Без Халанд на теренот Норвешка го загуби натпреварот. Кристофер Ајер ги донесе Норвежаните во водство во 36та минута, Жоао Кансело изедначи само две минути подоцна, а Гонсало Рамош го постигна победничкиот гол во 79та минута.
Халанд оваа сезона има седум гола, но против Португалија не се запиша меѓу стрелците. Норвешка е последна во групата А4, а Португалија е прва пред Данска и Велс.
Сити сега внимателно ќе ја следи неговата состојба пред гостувањето на Ливерпул на „Енфилд“ во неделата. Само три дена подоцна „граѓаните“ играат против Пари Сен Жермен во Лигата на шампионите, така што секој ден одмор е важен.
Тоа ќе биде прв натпревар на Сити откако клубот беше прогласен за виновен по обвиненијата за прекршување на финансиските правила на Премиер лигата. Од клубот веќе поднесоа жалба на одлуката.
И Ливерпул има свои грижи пред дербито. Хуго Екитике и Конор Бредли нема да играат, а под знак прашање се Коди Гакпо и Александер Исак, чија состојба ќе се проверува до последен момент.
