Интер на почетокот на репрезентативната пауза остана без тројца фудбалери поради повреди. Покрај Лаутаро Мартинез, кој веќе беше надвор од терените, тренерот Кристијан Киву нема да може да смета на напаѓачите Анж-Јоан Бони и Маркус Турам, како и на играчот од средниот ред Александар Станковиќ.
Бони во вторникот беше на клинички и дијагностички прегледи во Институтот Хуманитас во Розано, кои покажаа истегнување на мускулот на задната ложа на десното бедро, објави Интер. Според италијанските медиуми, Бони ќе отсуствува околу еден месец.
Турам почувствувал затегнатост во задната ложа на десната нога во неделата, за време на првенствената победа од 2-0 над Комо. Поради тоа, тој не тренираше со Франција во понеделникот, а бидејќи немало подобрување до вторник наутро, медицинскиот штаб на француската репрезентација, во договор со Интер и со играчот, одлучил да го врати во клубот, соопшти Француската фудбалска федерација.
Наместо Турам, селекторот Зинедин Зидан за првпат го повика 20-годишниот напаѓач на Борнмут, Ели Жуниор Крупи. Франција во четврток на Сан Сиро игра со Италија во Лигата на нациите, а потоа и со Турција.
Станковиќ ги напушти подготовките на Србија. Според соопштението на српската репрезентација, кое го пренесува Скај спорт Италија, тој во понеделникот на тренинг почувствувал болка во пределот на десните препони, а прегледите покажале повреда на адукторот на десното бедро. Тој се враќа во Интер за да го продолжи закрепнувањето.
Бони оваа сезона има постигнато три гола на 14 натпревари, два во Серија А и еден во Лигата на шампионите, но само двапати бил во стартниот состав. Турам постигна шест првенствени гола, пишува Газета дело спорт.
Повредите доаѓаат во момент кога Интер, по победата над Комо, има еден бод помалку од првопласираниот Лацио во Серија А.
