Ирска и Израел одиграа 1-1 во вториот меѓусебен натпревар од Групата Б3 во Лигата на нациите. Мечот се одигра без публика, на неутрален терен на ТСЦ Арена во Бачка Топола, Србија, пишува Скај спортс.
Домашниот натпревар на Ирска беше преместен во Србија, а Фудбалската асоцијација на Ирска уште во јуни соопшти дека станува збор за оперативни предизвици кои би можеле да влијаат на организацијата на мечот во земјата.
Ирците поведоа во 39та минута. По одбрана на израелскиот голман Асаф Цур, Џими Дан беше срушен од Дор Перец во борбата за одбиената топка. Судијата Хуан Мартинез Мунуера го досуди пеналот по долга ВАР-проверка, а Трој Парот го испрати Цур на погрешната страна. Парот има 10 гола на последните седум натпревари за репрезентацијата.
Израел изедначи помалку од две минути по почетокот на второто полувреме. Ударот на Оскар Глух од надвор од казнениот простор се одби од Лиам Скејлс, а Перец од близина погоди во долниот агол, наведува РТЕ.
Натпреварот помина во напната атмосфера. На полувремето избувна кавга пред тунелот, со жестока расправија меѓу играчите од двете страни. Израелската влада подоцна ги обвини ирските фудбалери за морално слепило, затоа што ги наведнаа главите за време на израелската химна, исто како и во првиот меч.
Екипата на Хеимир Халгримсон втор натпревар по ред не успеа да ја задржи предноста.
Со ремито Ирска е трета во групата со пет бода, колку што има и второпласираното Косово, кое е пред неа поради меѓусебниот натпревар. Лидер е Австрија со осум бода.
