Голманот Никола Митревски го најави вечерашниот старт на Еурофарм Пелистер во групната фаза од ЕХФ Европската лига. Битолчани вечерва од 20:45 часот го пречекуваат шпанскиот Логроњо Ла Риоха во салата „Боро Чурлевски“, во меч од групата Г.
„Доста време го чекавме овој натпревар. Од самиот старт на подготовките поминаа скоро два месеци и со нетрпение последните неколку дена и недели го чекаме, бидејќи најубавото во ракометот се полна сала и убави натпревари“, изјави Митревски за Курир.
Искусниот чувар на мрежата предупреди дека шпанските екипи се технички и тактички добро подготвени. „Шпанците имаат доста добро технички потковани играчи коишто си играат своја игра. Работевме во изминатиов период и ние доста добро. Мислам дека сме доволно спремни да одговориме на сите нивни напади и очекувам добар натпревар од наша страна. Влегуваме на хартија како фаворит, но тоа треба да се покаже на терен“, додаде тој.
Посебно ги повика навивачите да ја наполнат салата. „Би им порачал на фановите да дојдат, да нè бодрат, да ја наполнат спортската сала Боро Чурлевски. Да бидат како и секогаш наш осми играч. Ја имаме најдобрата навивачка група позади нас и заедно сите да се обидеме да издвоиме победа“, порача Митревски, во изјава што ја пренесоа и Дерби.
Пелистер во групата Г е со Гумерсбах, Логроњо Ла Риоха и полскиот Вибжеже Гдањск. Во првиот меч од групата Полјаците веќе победија на гости кај Гумерсбах, па бодовната слика пред битолскиот термин е отворена.
На клупата е Лино Червар, кој вчера на прес-конференција стави акцент на одбраната и публиката. Вечерва е прва можност да се види новиот проект во европски ритам на домашен паркет.
За Битола терминот 20:45 е повеќе од рутински старт: полната сала останува најсилниот аргумент на вицепрвакот пред шпанскиот гостин од АСОБАЛ.
