Јален Дурен останува во Детроит. Центарот на Пистонс на крајот го прифати петгодишниот договор вреден 200 милиони долари, целосно гарантиран, со што заврши четиримесечната пресметка со клубот, која траеше целото лето и се прелеа и во првите денови од тренинг-кампот, објави ESPN, повикувајќи се на неговиот агент Чафи Филдс.
Само неколку дена претходно Дурен ја одби истата сума, а главниот камен на сопнување беше клаузулата поврзана со телесната тежина, која Пистонс ја бараа во некои од претходните понуди. Во конечната верзија таа клаузула ја нема. Договорот е чист петгодишен, без опции и без бонуси, пренесува Hoops Rumors.
Одлука пред самиот рок
Дурен имаше рок до 23:59 часот по источно американско време во четвртокот да одлучи дали ќе ја прифати квалификациската понуда од 9,6 милиони долари за една година, со која следното лето ќе станеше слободен играч без ограничувања. Сепак, тој ја прифати понудата на Пистонс, која клубот ја држеше на маса две недели. Во текот на летото износот растеше од 170 на 190, а потоа и на 200 милиони долари.
Според ESPN, Дурен се чувствувал непочитуван од целиот процес, особено во споредба со договорот на Аусар Томпсон, кој потпиша продолжување на пет години вредно 155 милиони долари. Претходната есен Пистонс му нудеа околу 20 милиони долари годишно, а новиот договор ја удвојува таа сума.
Пистонс официјално го објавија продолжувањето во саботата, без да ги соопштат деталите, пренесува Field Level Media.
Најдобрата сезона, па пад во плејофот
22-годишниот центар зад себе ја има најдобрата регуларна сезона во кариерата. Просечно бележеше 19,5 поени и 10,5 скокови со 65 отсто шут од игра во 70 натпревари и му помогна на Детроит да заврши како прв носител на Истокот. Во плејофот бројките значително паднаа, на 10,5 поени и 8,5 скокови во 14 натпревари, а Пистонс беа елиминирани од Кливленд во седмиот натпревар од полуфиналето на Истокот.
Тренерот Џеј Би Бикерстаф порача дека не чувствува горчина. „Не знам од каде дојде тоа. Тоа се преговори, тоа е бизнис, но никогаш немало горчина меѓу групата и него“, изјави Бикерстаф. „Тој е во форма и е подготвен да ни помогне. Ќе си дадеме време да биде целосно подготвен, но возбудени сме што се врати.“
Пистонс ја отворија претсезоната со победа од 109-107 над Финикс, а Дурен не настапи на тој натпревар, покажува записникот на NBA.com. Според Hoops Rumors, центарот ќе може да биде разменет најрано од 15 јануари.
