Хорхе Мартин не се откажува од борбата за титулата во MotoGP. Возачот на Априлија, кој во саботата падна во спринтот на Филип Ајленд, ќе се обиде да се врати на моторот веќе овој викенд, на Големата награда на Малезија во Сепанг.
Компјутерската томографија во клиника во Мелбурн покажа дека Шпанецот има фрактура без поместување на долниот дел од радиусот на десната рака, блиску до зглобот. Првичниот сомнеж дека е скршена и лакотната коска беше исклучен, па нема потреба од операција. Затоа Мартин не се врати во Шпанија, туку веднаш отпатува за Куала Лумпур, пренесува Моторспорт.
„Засега не изгледа дека ќе биде потребна операција, што е прилично позитивна вест. Ќе работиме на тоа, апсолутно. Хорхе прв сака да ја постигне оваа цел, но мораме да го почекаме мислењето на лекарите. Сепак, прилично сме оптимисти“, изјави тим-менаџерот на Априлија, Паоло Бонора, за ГПОне.
Физиотерапевтот Аитор Томас подготви план за закрепнување во две фази. Првата е насочена кон намалување на отокот и враќање на подвижноста, силата и функционалноста на раката преку криотерапија и мануелна терапија. Доколку Мартин добие дозвола да вози, фокусот ќе биде на зглобот и справувањето со болката.
Од понеделник до четврток распоредот на Мартин ќе биде ограничен на терапии и одмор. Во четврток напладне медицинскиот тим на шампионатот, предводен од д-р Анхел Чарте, ќе процени дали може да учествува на првиот слободен тренинг во петок.
Трката на Филип Ајленд не се возеше поради лошото време, што му оди во прилог на Мартин, кој и онака беше прогласен за неспособен да вози. Марк Маркес по победата во спринтот има предност од 10 бода пред Мартин, објави MotoGP, а Марко Бецеки е трет со заостанување од 50 бода.
Новите медицински протоколи се построги кога станува збор за враќањето на повредените возачи, па конечната одлука ќе ја донесат лекарите на шампионатот.
