Дербито меѓу Вардар и Алкалоид во сабота, 14 ноември, ќе се игра во СЦ „Борис Трајковски“, а не во малата сала на СЦ „Јане Сандански“, како што беше првично најавено, пишува Слободен печат. Почетокот останува во 18:30 часот.
Според весникот, натпреварот ќе можат да го следат повеќе навивачи, а не само сопствениците на сезонски билети и членовите на навивачката група „Комити“, како што беше предвидено за малата сала.
На официјалната страница на РК Алкалоид дуелот веќе е најавен за 14 ноември во 18:30 часот, во салата „Борис Трајковски“.
На интернет-страницата на РК Вардар сè уште стои претходната информација дека натпреварот од 10. коло во Суперлигата ќе се одигра во малата сала на „Јане Сандански“ поради зафатеноста на поголемите сали во Скопје. Се очекува официјална потврда од домаќинот за промената на салата.
