Медведев со 6-3, 6-4 над Тиафо до полуфинале против Зверев

Тенисерот Даниил Медведев
Фото: Hameltion / Wikimedia Commons (CC BY-SA 4.0)

Даниил Медведев го совлада Френсис Тиафо со 6-3, 6-4 во одлучувачкиот натпревар од групата „Иван Лендл“ на завршниот турнир во Торино и се пласираше во полуфиналето, каде што в сабота ќе игра против првиот тенисер на светот, Александар Зверев, објави АТП.

Рускиот тенисер по четврти пат во кариерата стигна до полуфиналето на завршниот турнир, а првпат од 2023 година. Минатата година не се квалификуваше за Торино, но оваа сезона освои четири титули, а со триумфот над Тиафо ја забележа 54тата победа во годината.

Клучниот момент во првиот сет се случи при 2-2, кога Медведев заостануваше со 30-40 на свој сервис, но ги спаси двете брејк-топки што ги имаше Тиафо во тој гем. Во следниот гем, по неколку изедначувања, му го одзеде сервисот на Американецот за 4-2, а потоа сетот го затвори при 5-3. Во вториот сет, при 4-4, Тиафо спаси три брејк-топки, но Медведев ја искористи четвртата, а потоа на свој сервис го заврши натпреварот.

Според Тенис мејџорс, Медведев имаше 15 асови, ги спаси двете брејк-топки со кои се соочи и искористи две од шесте шанси за брејк. Тиафо имаше 14 винери, еден повеќе од Русинот, а двајцата направија по девет непредизвикани грешки.

Тиафо во текот на мечот доби опомена за пречекорување на дозволеното време меѓу поените, а при второто пречекорување му беше одземен првиот сервис, по што влезе во жестока расправија со главниот судија. „Едвај чекам да почне вонсезоната“, рече Американецот, кој од Торино си заминува со една победа во три натпревари.

„Завршниот турнир е одличен, бидејќи кога и да завршиш, добро е, затоа што на крајот од сезоната следува одмор. Но, ако продолжиш да играш, и тоа е одлично, бидејќи сакам да победувам. Само позитивни работи. Кога сум на терен, секогаш се борам за победа и денеска добро се изборив“, изјави Медведев.

Медведев, шампион од 2020 година, води со 14-8 во меѓусебните дуели со Зверев, но Германецот го доби последниот натпревар, минатата година во четвртфиналето на мастерсот во Париз. Според АТП, ова е нивна прва средба оваа година. Зверев го освои завршниот турнир во 2018 и 2021 година, кога токму во финалето го победи Медведев.

Со пласманот на Медведев, во полуфиналето се најдоа четворицата највисокорангирани носители: Зверев, Карлос Алкараз, Бен Шелтон и Русинот. Алкараз и Шелтон ќе го играат првото полуфинале, кое нема да започне пред 14:30 часот, а Зверев и Медведев ќе се сретнат најрано во 20:30 часот по нашето време.