МотоГП од следната сезона воведува значителни промени во распоредот на тркачкиот викенд. Комисијата за Гран при во среда ги потврди измените кои стапуваат на сила во 2027 година, а најголемата новина се посебните квалификации за спринт трката, објави FIM.
Досега единствените квалификации во сабота го одредуваа стартниот поредок и за спринтот и за главната трка. Од 2027 година секоја рунда ќе има два различни стартни грида, едниот за спринтот, а другиот за Гран при трката во недела.
Петок: два тренинзи и квалификации за спринтот
Петокот ќе почне со 45-минутен прв слободен тренинг, како и досега. Потоа следува вториот тренинг кој ќе трае 30 минути, наместо досегашниот еден час, и повеќе нема да носи директен пласман во втората квалификациска сесија. Денот ќе заврши со 15-минутни квалификации за спринтот, во кои учествуваат сите возачи и кои го одредуваат стартниот поредок за саботната спринт трка.
Во сабота трет слободен тренинг ќе трае 20 минути, наместо 30, а потоа следуваат квалификациите за главната трка. Во првата сесија од по 15 минути ќе возат сите возачи, а најбрзите 12 ќе се пласираат во втората сесија, во која се одлучува пол позицијата и првите четири реда на стартот за неделната трка. Спринтот и понатаму ќе се вози во саботата попладне.
Крај на загревањето во недела
Во недела се укинува десетминутното загревање на МотоГП класата. Наместо тоа, пред главната трка излезот од боксовите ќе биде отворен десет минути, за возачите да можат да направат неколку кругови за проверка на мотоциклите. Така главната трка од 45 минути ќе биде единствената акција на МотоГП класата во недела, пишува Crash.net.
Според Motorsport.com, првично се разгледувала и можноста саботните квалификации да се поделат на три дела, по примерот на Формула 1, но тој предлог бил одбиен при гласањето во Шпилберг. Укинувањето на загревањето, пак, на возачите ќе им остави повеќе време за промотивни активности и за подготовка за главната трка.
Ова е најголемата промена на форматот од воведувањето на спринт трките во 2023 година, а се совпаѓа со новите технички правила кои стапуваат на сила во 2027 година.
