Мартин Томовски одигра уште еден силен натпревар во германската Бундеслига, но неговиот Битигхајм остана без бодови против Фуксе Берлин. Македонскиот репрезентативен голман имаше 14 одбрани, односно околу 30 проценти успешност, а домаќините загубија со минимални 31-32 во седмото коло.
Натпреварот имаше и посебно значење за Томовски. Според германскиот Dyn, македонскиот чувар на мрежата против Фуксе го одигра својот 100ти натпревар во Бундеслигата и продолжи таму каде што застана во претходното коло, кога имаше 16 одбрани против Магдебург.
Од првите минути се играше брзо и со многу голови. Битигхајм храбро се спротивстави на фаворитот од главниот град, но гостите отидоа на одмор со водство од 20-17. Десет минути пред крајот Фуксе водеше со 31-26 и се чинеше дека мечот е решен, пишува Sportschau.
Тогаш домаќините, предводени од Томовски на голот, тргнаа во силен финиш. Битигхајм се приближуваше гол по гол. Околу минута и пол пред крајот, при две разлика, Тил Херман шутираше кон празен гол, но ја погоди пречката.
Дваесетина секунди пред крајот Битигхајм преку седумметар се приближи на 31-32, но немаше време за целосен пресврт. Фуксе успеа да ја сочува минималната предност и да ги однесе двата бода.
Најефикасен на натпреварот беше Александар Пфајфер од Битигхајм со девет гола, сите од седум метри. Кај гостите Матес Лангхоф постигна седум гола, а Тим Фрајхофер, Матијас Гидсел и Тобијас Грендал по шест, пишува rbb24. На другата страна, голманот Ласе Лудвиг имаше 11 одбрани.
Фуксе, кој неодамна се врати од Светското клупско првенство во Египет, со оваа победа стигна до петти триумф во шести натпревар во првенството и се искачи на четвртото место.
Битигхајм како новајлија во лигата и понатаму е во долниот дел од табелата, но со вакви изданија на Томовски тимот покажува дека може да им парира и на најголемите. Следниот предизвик за македонскиот голман и неговите соиграчи е натпреварот против Гепинген.
