Шампионот Оклахома Сити Тандер ја слави победата над Лос Анџелес Клиперс со 108-101, но во соблекувалната немаше славје. На една минута и 14 секунди пред крајот, Џејлен Вилијамс се здоби со тешка повреда на левата нога и мораше да биде изнесен од паркетот на носилка.
При напад кон кошот, Вилијамс беше во воздух меѓу двајца противници, Дерик Џонс Јуниор пред него и Крис Дан зад него. При доскокот, левата нога му остана заглавена под телото, а натпреварот беше прекинат околу пет минути, пренесува НБА. По видеопрегледот, судиите му досудија флагрантна грешка на Дан.
Додека го изнесуваа, Вилијамс со двата палци кренати нагоре им се заблагодари на навивачите, кои го испратија со аплауз. Неговите соиграчи беа видно потресени.
„Едноставно ми е жал за него. Ништо повеќе од тоа“, изјави Шеј Гилџес-Александер, а тренерот Марк Дејно накратко додаде: „Не сме добро“, пишува АП.
Клубот засега нема официјална дијагноза. Од Тандер најавија нови информации по прегледите, а сигурно е дека Вилијамс нема да игра во понеделник против Финикс Санс. Дополнителна грижа за Дејно претставуваат Кејсон Волас и Џејлин Вилијамс, кои исто така го напуштија паркетот поради повреди уште во првата четвртина против Клиперс, објави ЦБС спортс.
Вилијамс е едно од клучните имиња во тимот од Оклахома. Тој беше дел од шампионската генерација во 2025 година, а зад себе има настапи на Ол стар натпреварот и место во идеалниот тим на лигата. Во првите 250 натпревари во НБА имаше просек од околу 18 поени.
Минатата сезона ја помина главно во борба со повредите, па одигра само 33 натпревари. Затоа и оваа повреда во Оклахома беше дочекана со голема загриженост.
