Новиот светски шампион во Формула 1, Кими Антонели, смета дека Макс Верстапен ќе биде најголемата закана при одбраната на титулата следната сезона, пренесува официјалната страница на Формула 1.
„Ако треба да изберам еден возач, би рекол Макс. Тој е оној што можеби ќе направи најмногу проблеми“, изјави возачот на Мерцедес на прес-конференцијата во Сан Марино, организирана од италијанската телевизија Скај спорт.
Антонели ја обезбеди титулата со третото место во Мексико Сити, зад поранешните шампиони Верстапен и Луис Хамилтон. До триумфот стигна со девет победи и уште седум пласмани на подиумот.
Верстапен ја пропушти титулата во 2025 година за само два бода, а оваа сезона, по пресвртот на Ред Бул, се искачи на второто место во поредокот.
„Мислам дека следната година ќе има многу тесна борба меѓу сите врвни тимови, бидејќи веќе сме многу блиску. Ред Бул со сите надградби продолжи да напредува. Мекларен имаше период кога направи огромен чекор, па период кога можеби беше потешко, но сега повторно се врати. Ферари е секогаш тука“, рече Антонели.
„Би било неверојатно да има борба меѓу сите нас од врвните тимови, вклучувајќи ги Луис, Шарл, мојот соиграч, Макс и Ландо“, додаде младиот Италијанец.
Ферари оваа сезона има две победи, а Ландо Норис три за Мекларен, но формата на двата тима осцилираше, што му отвори простор на Ред Бул.
„И покрај титулата, можеби сум уште погладен од порано. Ова е само почеток. Ќе се обидеме да освоиме уште трки, добро да ја завршиме 2026 година и силно да стартуваме во 2027“, изјави Антонели, пренесува Кориере дело спорт.
